Барақ хан - Алтын Орда ханы, Орыс ханның немересi , Құйыршық ханның ұлы. Шамамен XIV ғасырдың 2- жартысында дүниеге келiп, 1428 жылы қайтыс болған. 1419-1422 жылдары ұлықбектiң көмегiмен Шығыс Дештi Қыпшақта (Ақ Ордада) билүiк басына келедi.1422 жылы Едiлдiң бойында Алтын орда әскерiн жеңiп, таққа отырады . 1426 жылы Ұлық Мұхаммед ханнан жеңiлiп , тағынан айырылады да, Ноғай ордасының мырзасы Мансұр бимен одақ құрады. Мансұр би Құйыршықтың қызынан туған жиенi болатын. Билiк үшiн таласта Барақ хан Мансұр бидi өлтiредi. Осыдан кейiн Алтын Орда жерiнде қала алмаған Барақ хан ығысып келiп, 1426-27 жылдары Сырдария бойындағы қалалар үшiн Ұлыбекпен соғысады. 1427 жылы өзiне қарсы аттанған Ұлықбектiң әскерiн тас талқан етiп, Мәуереннахарға жорық жасайды. Барақ хан 1428 жылы Ноғай ордасының мырзалары Қази, Наурызбен болған соғыста қаза табады. Барақ хан өлген соң, Шығыс Дештi Қыпшақта (Ақ Ордада) шайбанилық Әбiлхайыр ханның 40 жылдық билiгi орнайды. Барақ ханның Мiр Сеид, Мiр Қасым және Би Сайид (Жәнiбек хан) деген үш ұлы болды.
|